Sóknarnefnd
og helstu viðfangsefni
Aðalfundur Íslensku kirkjunnar í
Svíþjóð var haldinn í Gautaborg sunnudaginn 27.
janúar 2008. Þau þáttaskil urðu að Kristinn
Jóhannesson lét af störfum, en hann hafði verið formaður
sóknarnefndar frá upphafi eða frá 1994. Hefur hann ötullega
og af alúð unnið að viðgangi íslenska safnaðarstarfsins.
Voru honum færðar þakkir fyrir mikilvægt framlag og brautryðjendastörf
fyrir Íslensku kirkjuna í Svíþjóð.
Ný
safnaðarnefnd var kjörin og skipti þannig með sér verkum
á fyrsta sóknarnefndarfundi:
Guðný Ása Sveinsdóttir,
formaður
Birna Ágústsdóttir, ritari
Rósa
Jónasardóttir, gjaldkeri
Ingibjörg Gísladóttir,
meðstjórnandi
Guðrún Bragadóttir, meðstjórnandi
Ingibjörg
Pálsdóttir, meðstjórnandi
Kristinn Kristinsson, meðstjórnandi
Á
árinu 2008 hélt sóknarnefnd 9 fundi og einn fund það
sem af er þessu ári. Fundirnir hafa með einstaka undantekningu
verið haldnir í safnaðarheimili Västra Frölunda kirkju
þar sem söfnuðurinn í Gautaborg og prestur hafa aðstöðu
sína. Á fundunum hafa farið fram umræður um tilhögun
og skipulagningu kirkjustarfsins, um samvinnuna við Sænsku kirkjuna
og aðra styrktaraðila og um fjármál safnaðarins. Sóknarnefnd
hefur kosið að gera drög að starfsreglum fyrir sóknarnefnd
Íslensku kirkjunnar í Svíþjóð, sem mun kynnt
á aðalfundi 2009. Starfsreglur þessar byggja á reglum
fyrir sóknarnefndir á Íslandi en eru aðlagaðar aðstæðum
hér.
ÍKS hefur tvisvar á árinu, vor og haust,
sent frá sér um 2300 fréttabréf um starfsemina til
Íslendinga í Svíþjóð. Unnið er að
því að fá sem flest Íslandstengd heimili inn á
útsendingarskrá fréttabréfsins og leggur prestur töluverða
vinnu í að hafa upp á nýjum einstaklingum og að viðhalda
skránni. Auk þess auglýsir prestur kirkjustarfið reglulega
í "kirkjupósti" sem sendur er á þau tölvunetföng
sem við vitum um á Gautaborgarsvæðinu. Í Stokkhólmi,
Uppsölum, á Skáni og víðar, eru sendar tilkynningar
inn á þau samskiptanet sem eru fyrir hendi meðal Íslendinga
á hverjum stað.
Heimasíða íslensku kirkjunnar
í Svíþjóð (www.kirkjan.se) er uppfærð
reglulega og umsjón með síðunni hefur Ágúst
Einarsson. Guðsþjónustur, kirkjuskólar og fermingarfræðsla Gautaborg.
Guðsþjónustur hafa að jafnaði verið haldnar einu
sinni í mánuði í Västra Frölunda kirkju (sept.
til maí) með altarisgöngu í annari hverri guðsþjónustu.
Kirkjusókn hefur verið ágæt, yfirleitt um 50-70 manns
og mun fleiri við hátíðarguðsþjónustur.
Kirkjuskóli
er tvisvar í mánuði. Fyrirkomulagi barnafræðslu í
tengslum við guðsþjónustur hefur verið haldið áfram
að nokkru. Börnin taka þátt í hluta guðsþjónustunnar
en njóta síðan sérstakrar fræðslu. Með
þessu fær öll fjölskyldan tækifæri til þess
að njóta samverunnar í kringum helgihaldið.
Í
Stokkhólmi eru guðsþjónustur í Finnsku kirkjunni
að jafnaði annan hvern mánuð og þar að auki hátíðarguðsþjónustur
tengdar við jól, páska og 17. júní. Nýjung
í haust var að kirkjuskóli tók til starfa í Stokkhólmi
einu sinni í mánuði í samvinnu við Íslendingafélagið
á staðnum. Þetta er mikil og ánægjuleg viðbót
við íslenskt kirkjustarf í höfuðborginni.
Í
Uppsölum var kirkjuskóli annan hvern laugardag í Tunabergskirkjunni.
Þar var aðventuguðsþjónusta í desember nýjung
í starfinu sem höfðaði til breiðari hóps og mæltist
vel fyrir.
Í Lundi var kirkjuskóli annan hvern laugardag í
St. Hans kirkju.
Guðsþjónustur í Malmö/Lundi:
Páskaguðsþjónusta var í apríl í Arlövkirkju
í samvinnu við Íslendingafélagið í Malmö
og jólahelgistund í St Hans kirkju í Lundi á Þorláksmessu.
Í guðsþjónustu að vori var einnig ferming.
Í
Helsinki í Finnlandi var guðsþjónusta um miðjan apríl
í kapellu Dómkirkjunnar. Íslendingafélagið í
Helsinki hefur óskað eftir guðsþjónustu einu sinni
á ári og Biskupsstofa hefur greitt ferðakostnað. Í
guðsþjónustunni þetta árið var barn borið
til skírnar.
Fermingarfræðslan er ekki staðbundin og var
á árinu með hefðbundnu sniði. Fermingarbúðir
voru haldnar í Åh stiftsgård 16.-18. maí þar sem
17 börn frá Svíþjóð, 8 frá Noregi og
6 frá Danmörku voru mætt. Leiðbeinendur auk séra
Ágústs voru sr. Arna Grétarsdóttir og sr. Helgi Hróbjartsson
prestar Íslendinga í Noregi. Í haust hóf nýr
hópur frá Svíþjóð og Noregi fermingarfræðslu
með samveru í Åh stiftsgård dagana 27.-28. september og
eru 12 börn frá Svíþjóð í fermingarhópi
vetrarins. Milli fermingarbúða lesa ungmennin íslenska kennslubók
í fermingarfræðum og leysa reglulega verkefni í tölvusamskiptum
við sóknarprestinn. Auk þess er boðið upp á fræðslutíma
eftir því sem við verður komið. Einnig sækja ungmennin
guðsþjónustur minnst mánaðarlega í heimabyggð
sinni. Barnastarfið er mikilvægur þáttur í
safnaðarstarfinu og er mjög ánægjulegt að það
skuli vera öflugt og vaxandi. Söfnuðurinn hefur í öllu
þessu starfi notið hjálpar duglegra og áhugasamra leiðtoga
sem við viljum þakka mjög góð störf. Önnur
starfsemi og viðburðir Fyrirlestur. Árni Svanur Daníelsson,
guðfræðingur, var á ferðinni í Gautaborg í
tengslum við kvikmyndahátíð í janúar. Hélt
hann fyrirlestur í safnaðarheimili V Frölunda sem hann kallaði
" Guð á hvíta tjaldinu".
Kyrrðarstund. Í
byrjun apríl var "Kyrrð, kaffi og ljóð", sem hófst
með helgistund í kirkjunni og hélt síðan áfram
í safnaðarheimili V Frölunda, þar sem þátttakendur
deildu með sér uppáhaldsljóðum sínum. Mæting
var góð og lásu þáttakendur upp ljóð
eða mæltu þau af munni fram og sungu jafnvel. Í lok nóvember
var aftur "Kyrrð, kaffi og ljóð" og þá las
Kristín Bjarnadóttir ljóðskáld úr tangóljóðum
sínum með tónlistarlegu ívafi til mikillar ánægju
fyrir þá, sem viðstaddir voru.
Fjölskyldumót var
haldið 2.- 4. maí í Visingsö, eyju á Vätternvatni,
og markaði það að venju lok kirkjuskólastarfs vetrarins.
Íslenskar barnafjölskyldur komu frá þremur landshornum,
Gautaborg, Uppsölum og Lundi og mættust þar miðja vegu. Mótið
var mjög vel sótt og tókst í alla staði vel. Um
120 manns vildu koma en við gátum aðeins tekið við 90 manna
hópi. Miðað við 50 manna mót síðustu ár
kom þátttakan okkur skemmtilega á óvart. Á dagskrá
var sem fyrr: kirkjuskólasamverur, kvöldvökur, leikir og útivera
í fögru umhverfi.
Námskeið. Séra Sigurjón
Árni Eyjólfsson kom og hélt tvo fræðslufundi í
lok maí: "Hvað er að trúa og vera kristinn?" og
"Er Guð til - rökin með og á móti". Fundir
þessir voru fámennir, fróðlegir og skemmtileg umræða
í kjölfar þeirra.
Kórheimsókn. Í lok
ágúst fengum við heimsókn Gospelkórs Húsavíkurkirkju
og söng hann fyrir okkur við gospelguðsþjónustu í
V- Frölundakirkju undir stjórn Guðna Bergssonar.
Leiðtoganámskeið.
Biskupsstofa á Íslandi býður hvert haust upp á
leiðtoganámskeið fyrir fólk í íslensku barnastarfi
á Norðurlöndum og var námskeiðið að þessu
sinni í Kaupmannahöfn í byrjun september. Þar mættu
12 leiðtogar frá Svíþjóð og tókst námskeiðið
afar vel.
Bókmenntakvöld. Í tengslum við bókaþing
í lok september var Halldór Guðmundsson rithöfundur hér
á ferð. Hann þáði boð um að koma á
bókmenntakvöld í Västra Frölunda og sagði hann
þar frá þeim Halldóri Laxness, Gunnari Gunnarssyni og
Þórbergi Þórðarsyni. Voru um 30 manns saman komnir
til að hlusta og ræða við Halldór.
Samkirkjulegt
starf. Í október tókum við að venju þátt
í árlegri samkirkjulegri messu með erlendum söfnuðum
í Gautaborg. Þar sameinast dönsku, norsku, þýsku,
finnsku, ensku og eistnesku söfnuðirnir um helgihald.
Jólasamverur
fyrir alla fjölskylduna voru haldnar í Gautaborg, Lundi, Uppsölum
og Stokkhólmi í tengslum við kirkjuskóla. Þessar
samkomur voru afar vel sóttar, samtals yfir 400 manns, börn með
foreldrum og mæltust vel fyrir.
Leshringur um bókmenntir undir
stjórn Ágústs Einarssonar hefur haldið áfram að
hittast reglulega.
Áfram hefur verið boðið upp á
bókaborð í sambandi við kirkjukaffið í Gautaborg.
Er þar hægt að sjá og kaupa á vægu verði
ýmsar bækur og geisladiska, mest kirkjulegs efnis, en einnig íslenskt
landkynningarefni.
Sóknarprestur hefur samvinnu við Gídeonfélagið
á Íslandi og afhenti unglingum í fermingafræðslu
Nýja testamenti að gjöf. Húsnæði Skrifstofa
prests, guðsþjónustur, barnastarf, kóræfingar, ýmsar
samkomur og fundir á vegum safnaðarins fá inni í Gautaborg
hjá Västra Frölunda församling, samstarf sem við metum
mikils.
Á Skáni, í Stokkhólmi og Uppsölum
höfum við notið gestrisni sænsku kirkjunnar þar sem kirkjuskóli
og helgistundir hafa fengið inni í kirkjum og safnaðarheimilum.
Kirkjutónlist Íslenski kórinn í Gautaborg
fær fjárhagsstuðning frá ÍKS fyrir að leiða
kirkjusönginn. Í því felst að hafa forsöng í
almennum safnaðarsöng og að flytja stólverk í hverri
messu.
Kristinn Jóhannesson, sem verið hefur stjórnandi kórsins
frá upphafi, lét af þeim störfum eftir vorönn. Tuula
Jóhannesson, sem hefur annast orgelleik frá upphafi kirkjustarfs,
lét samtímis af störfum. Þeim sé þökk
fyrir góð störf. Nýr kórstjóri og organisti,
Seth-Reino Ekström, tók við haustið 2008.
Á aðventuhátíðinni
í byrjun desember var að venju áhersla á fjölbreyttan
tónlistarflutning og söng íslenski kórinn þar
ásamt fleiri aðilum, ungum sem eldri.
Í Stokkhólmi
hefur íslenski kórinn (ÍSÍS-kórinn) leitt kirkjutónlistina
undir stjórn Brynju Guðmundsdóttur sem jafnframt annast undirleik.
ÍSÍS-kórinn hefur fengið fjárhagsstuðning
frá ÍKS til þessa.
Í Lundi hafa söngstundirnar
í tengslum við kirkjuskólann verið án undirleiks
en gengið vel. Íslendingakórinn í Lundi undir stjórn
Huldu Birnu Guðmundsdóttur hefur tekið þátt í
guðsþjónustum eins og að ofan greinir.
Í Uppsölum
eru nokkrir foreldrar barnanna liðtækir í gítarleik og
höfum við notið þess í helgihaldi kirkjuskólans.
Það
er full ástæða að undirstrika, að það er bæði
kórum og kirkju hagur að því að sem best og mest samstarf
sé þeirra á milli. Það er reynsla margra kóra
og kórstjórnenda að kirkjan sé góður bakhjarl
í starfseminni og kirkjustarf yrði stórum fátækara
ef ekki kæmi til samvinna við gott tónlistarfólk. Sálgæsla
og önnur félagsleg aðstoð Söfnuðurinn leggur
á það áherslu að unnt sé að veita liðssinni
öllum þeim sem á slíku þurfa að halda, ungum
sem öldnum. Í Svíþjóð búa nú
um 6 þúsund Íslendingar og er þörfin fyrir slíkt
því mikil og jöfn. Á síðustu árum hafa
komið upp ýmis og margvísleg tilvik sem hafa fært okkur
heim sanninn um nauðsyn slíkrar þjónustu fyrir þennan
dreifða hóp. Presturinn er ætíð til staðar til
sálgæslu og aðstoðar, t.d. þegar andlát eða
aðra erfiðleika ber að höndum.
Sóknarnefnd hefur gert
einfalda áfallahjálparáætlun til að styðjast
við ef alvarlegt slys eða áfall yrði, þar sem Íslendingar
væru beint eða óbeint viðriðnir. Sóknarnefnd getur
aðstoðað stofnanir og aðila í sænsku samfélagi,
sem hafa aðalhlutverk við slíkar aðstæður. Þar
er t.d. átt við hjálp með tungumálið og þekkingu
á íslenskum aðstæðum fyrir utan aðstoð eftir
þörfum og óskum.
Fólk kemur í auknum mæli
á skrifstofu prests með hin ýmsu mál til úrlausnar
og presturinn heimsækir þá er þess óska. Þetta
gildir bæði um Gautaborg og eins í sambandi við ferðir
prests um aðra hluta Svíþjóðar. Sænska sjúkrahúskirkjan
og sendiráð Íslands benda á þjónustu íslenska
prestsins og óskir berast frá Íslandi um aðstoð við
sjúklinga sem hingað koma í aðgerðir.
Kirkjustarfið
hefur umsjón með hjálparsjóðnum "minningarsjóðurinn
Siggi" - Íslenski kórinn í Gauataborg hefur undanfarin
ár lagt til andvirði eins kirkjukaffis í sjóðinn.
Vert er að hvetja fólk til þess að vera ófeimið
við að leita til prestsins bæði sjálfs sín vegna
og annarra sem hugsanlega þætti vænt um að fá heimsókn
og aðstoð prests.
Skírnum hefur töluvert fjölgað
og sama gildir um önnur embættisverk. Er þá einnig ótalinn
sá fjöldi barna og ungmenna sem nýtur kirkjuskóla- og
fermingarfræðslu prestsins. Tengslin við Íslensku þjóðkirkjuna Íslenska
kirkjan í Svíþjóð miðar starfshætti sína
við starfsemi móðurkirkjunnar heima á Íslandi. Safnaðarnefndin
vinnur með "stefnu og starfsáherslur" sem taka mið af
Þjóðkirkju Íslands en eru aðlöguð að
sérstökum aðstæðum okkar hér í Svíþjóð
og sama gildir um starfsreglur sóknarnefndar sem áður er getið
um. Í barna- og unglingastarfi kirkjunnar sækjum við nær
allt kennsluefni til útgáfufélags íslensku kirkjunnar,
Skálholtsútgáfunnar.
Sr. Jón Dalbú Hróbjartsson
prófastur, sem er tilsjónarmaður okkar fyrir hönd biskups,
var hér í stuttri heimsókn í byrjun febrúar.
Hafði prófastur fund með formanni og fulltrúum úr
starfandi sóknarnefnd ásamt fyrrverandi formanni. Fundur sá
var jákvæður og okkur hinn besti stuðningur. Starfsfólk
af biskupsstofu var hér á ferð í febrúar og október
og heimsóttu okkur óformlega í leiðinni.
ÍKS
fagnar 15 ára afmæli á haustdögum 2009 og er ætlunin
að halda þetta hátíðlegt með messu sunnudaginn
13. september. Sr. Jón Dalbú Hróbjartsson prófastur
mun koma og halda upp á tímamótin með okkur. Hefur sóknarnefnd
einnig sent bréf til Biskups Íslands, herra Karls Sigurbjörnssonar,
til að athuga hvort möguleiki sé fyrir hendi að hann geti
einnig tekið þátt í hátíðarguðsþjónustunni.
Fjármál Á starfsárinu hefur söfnuðurinn
notið styrkja frá sænsku kirkjunni, kirkjumálasjóði
íslensku Þjóðkirkjunnar, Göteborgs kyrkliga samfällighet
og sænska ríkinu eins og sjá má á reikningum.
Íslenska safnaðarstarfið er rekið fyrir þessi styrktarframlög
og erum við afar þakklát þessum aðilum fyrir að
gera starfsemi okkar mögulega. Kirkjan á Íslandi greiðir
laun prests.
Eins og sjá má af ársreikningum haldast tekjur
og gjöld nokkurn veginn í hendur starfsárið 2008. Hefur
starfið að mestu leyti verið með svipuðu sniði og áður.
Sú nýbreytni að bjóða upp á mánaðarlegt
barna og fjölskyldustarf í Stokkhólmi er mjög jákvæð
viðbót. Með þessu höfum við þrefaldað
þær samverur, sem við bjóðum upp á í
Stokkhólmi. Þessi nýjung hefur aukið útgjöld
í barnastarfi og kallað á meiri ferðalög prestsins.
Þar sem styrkir til kirkjustarfsins aukast ekki verðum við að
sýna aðhald og reyna að beina fjármununum í það
sem er mest í samræmi við stefnu og starfsáherslur.
Fyrir
utan daglegt rekstrarfé á söfnuðurinn tvo sjóði.
Annars vegar er það "menningarsjóðurinn" sem söfnuðurinn
getur notað til sérstakra verkefna. Hins vegar er "minningarsjóðurinn
Siggi" sem er hjálparsjóður kirkjustarfsins, stofnaður
til að styðja flutning látinna til jarðsetningar á Íslandi
en gefur einnig möguleika á að styrkja einstaklinga í neyð.
Sóknarnefnd hefur umsjón með þessum sjóðum
og tekið er með þakklæti á móti framlögum
í sjóðina. Lokaorð Sóknarnefndin vill
hér og nú þakka öllum þeim sem hafa unnið að
því að gera hlut íslensku kirkjunnar í Svíþjóð
sem bestan. Starf kirkjunnar er undir því komið að Íslendingar
sjái þörf á og finni gleði í starfi því,
sem fer fram á mismunandi stöðum í þessu aflanga
landi og að þeir sýni það með návist sinni
og þátttöku. Hugmyndir um allt sem betur mætti fara eru
vel þegnar.
Fyrir hönd sóknarnefndar, 25. janúar
2009 Guðný Ása Sveinsdóttir
ÝTIÐ
til að fá Skýrslu sóknarnefndar 2004 á PDF fomi.
Krefst að Adobe Reader er uppsettur
á tölvunni. Ýtið: 
til að sækja forritð. Það er til afnota endurgjaldslaust. |
